Read more

Afhayeenka golaha dhaqanka iyo midnimada beelaha haweye Axmed Diiriye Cali ayaa kooxaha Xisbul Islaam iyo Al Shabaab u qabtay in mudo 24 saac ah ay ku ogolaadaan wadahadal ay la galaan dowladda KMG

Isagoo maanta la hadlayay qaar ka mid ah warbaahinta Muqdisho ayaa Afhayeenka golaha dhaqanka iyo midnimada beelaha Hawiye Axmed Diiriye Cali waxaa uu sheegay in uu ku celinayo baaq dhowr  jeer  oo horay uu u jeediyay Xarakada Mujaahidiinta Al Shabaab iyo Ururka Xisbul Islaam kaasi oo ku aadaana inay ogolaadaan wadahadal ay la galaan dowladda KMG Soomaaliya.

Axmed Diiriye ayaa sheegay in looga baahanyahay dhinacyadaasi in mudo 24 saac gudahood ah ku qaatana Baaqaasi si loo bad baadiyo dhiiga shacabka Soomaalida ah ee maalin walba ku daadanaya dagaalada ay ka wadaan Magaalada Muqdisho.

Waxaa uu Afhayeenku Caqabad ku tilmaamay in laga dhaga fureysto Baaq ay jeediyeen, waxaana uu tilmaamay in hadii taasi ay imaato ay dhalan karaan dhibaatooyin horleh oo aan umada dan u aheeyn.

Afhayeenka golaha dhaqanka iyo midnimada Beelaha Hawiye Axmed Diiriye Cali ayaa carabka ku dhiftay in dhowr jeer ay baaqyo u jeediyeen dhinacyada ku dagaalamaya dalka Soomaaliya kuwaasi oo uu tilmaamay in laga dhagafureystay, waxaana uu tilmaamay in taasi badalkeeda ay ka dhasheen dhibaatooyinkii labadii sano ee la soo dhaafay ka dhacay dalka Soomaaliya.

Lama oga sida ay ku aqbali doonaan Al Shabaab iyo Xisbul Islaam Baaq ay u soo jeediyeen odayaasha dhaqanka iyo midnimada Beelaha Hawiye, maadaama  Masuuliyiinta kooxahaasi ay dhowr jeer ku cel celiyeen inay ogoleyn wadahadal ay la galaan dowladda Madaxweyne Sheekh shariif Sheekh Axmed.