Ergada ansixinta dastuurka qabyadaha ee Soomaaliya ayaa goordhow Cod buuxa ku ansixiyay dastuurka cusub ee ay Soomaaliya yeelanayso, iyadoo ay jireen xubno ka diiday ansixinta iyo kuwo ka aamusay, hase yeeshee Ergada shirka joogta ayaa intooda badan ansixisay 96%.

Destuurka cusub ayaa ahaa mid loo codeeyay, iyadoo codeynta ay ahayd mid gacan taag ah ayaa waxaa codkooda ka dhiibtay 645 Ergo oo ku sugnaa xarunta uu shirka ansixinta ka socday, waxaana 621 Ergo oo u dhiganta 96% ay ku codeeyeen HAA, iyadoo sidoo kale ay 13 Ergo ay iyaguna diideen, kuwaasoo u dhigma 2%, waxaa iyagana ka aamusay 11 Ergo oo 2% ka noqonaya ergooyinka codeeyay.

Waxay Ergooyinka u codeeyeen su'aal ahayd (Si uu waddanku uga baxo xalaadda uu ku sugan yahay, uguna diyaargarowno dib u dhiska dalkeenna, una helno bulsho cadaalad ku dhisan, ma ansixinaa dastuurka KMG ah illaa inta looga ansixinayo afti Qaran], iyadoo natiijad codaynta uu ku dhawaaqay Prof. Xuseen Warsame iyo Nimco Axmed oo ka mid ahaa ergooyinka ansixinta dastuurka, waxaana goobta oo dhan camiray sacab iyo heeso ay qaadayeen ergooyinka dastuurka ansixiyay.

C/weli Maxamed Cali Gaas Ra'iisul wasaaraha Soomaaliya ayaa sheegay in markii la soo billaabay qorshaha dastuurka in laga faafiyay dacaayado badan, wuxuuna sheegay inay xukuumaddiisa ay howsha ugu horreysay ee ay ku talogashay ay ahayd in la fuilyo afartii qodob ee ku qornaa Roadmap-ka.

"Mudadii halka Sanno ahayd iyo Dadaalkeenii ahaaa in Soomaaliya ay dastuur yeelato maanta ayay dhabowday, waxaana uga mahadcelinayaa arrintaas ergada ansixinta dastuurka oo xil gaar ah iska saray inay mas'uuliyadii dusha ka saarnayd" ayuu yiri ra'iisul wasaaraha DKMG ah ee Soomaaliya.

Xarunta Shirka ayaa waxaa lagu camiray sacab iyo Heeso wadani ah, waxayna Ergadu muujiyeen sida ay ugu faraxsan yihiin qaabka loo ansixiyay Destuurka Cusub ee ay Soomaaliya yeelanayso, iyadoo ansixisay Destuurka dhamaantooda la wada gudoonsiiyay Shahaado sharafyo ka tarjumaya inay Ergadu tahay Ergadii kansixisay Destuurka Soomaaliya.